【放养狗花花 – 天天看世界 - 日常】
花花︰「又一日新开始啦！」﹙花花伸一伸懒腰﹚
「寻晚发咗个怪梦，有人俾咗好多好多嘢食我哋呀，个个都食到好饱！」
花花︰「唔知今日去边道玩好呢？Mimi？小黑队长？」
小黑队长︰「我想继续瞓，寻晚成晚巡逻都未瞓够。」
Mimi︰「我想等『妈妈爸爸』落楼，可能会有嘢食！」
小黑队长︰「佢哋都唔系你真嘅爸爸妈妈！」
Mimi︰「我当系㗎啦！」
花花︰「正一为食鬼！」
花花︰「唔好嘈住，曲架哥哥出紧嚟！」﹙花花嘅电动尾摇过不停﹚
Mimi亦不甘视弱，用佢最快嘅速度跑过去。
曲架哥哥︰「狗狗、狗狗，你哋好精神㖞！我要返工啦，拜拜。」
花花︰「Mimi你睇，二楼大姊姊都落楼啦，我哋过去睇吓。」
花花、Mimi︰「早晨呀！大姊姊！」﹙花花同Mimi向大姊姊鞠躬讲早晨﹚
Mimi︰「今朝不如跟大姊姊出去散吓步？」
花花︰「都好。」
小黑队长、黄黄︰「等埋我哋呀！」﹙黄黄同小黑队长由老远跑过嚟﹚
我哋仲问埋高底耳会唔会一齐去。
高底耳︰「我要守住个地盘，万一隔离肥宝同瘦宝过嚟就无人应付佢哋。」
﹙高底耳一本正经又好似学者咁同我哋分析形势﹚
于是，我哋就浩浩荡荡跟著大姊姊出去。
通常一朝早路上都有好多晨运嘅公公婆婆、男男女女，有人做六通拳同八段锦、有人做甩手操、有人听歌跑步，亦有人倾偈吹水，各式其式。
突然，大姊姊发现前面有位大婶带住一只腊肠狗喺度同几位晨运客吹水，腊肠狗好似意识到佢后面有其他狗出现，于是乎佢望向后面，吓然见到我哋四只大狗响佢后面行紧，佢简直腾晒鸡，不知所措。
腊肠狗︰「有无搞错，晨咁早就撞到四位人兄，真系该煨啰！」
「佢哋睇我唔到，睇我唔到…………睇我唔到！」
腊肠狗不断望向主人求救，但系佢主人只系挂住同旁边嘅人一路行一路倾，无理过佢；于是，腊肠狗就一路行一路望住后面，怕我哋从后偷袭。
呢个时候，大姊姊立时退后一步，好似示意我哋佢会改行第二条路，黄黄系第一只望到大姊姊，于是佢叫我哋留意，我哋都好合作，然后去到一个停车场入口，大姊姊迅速转入停车场，我哋亦好快跟上，结果平息咗呢场不必要嘅「大战」，腊肠狗亦松一口气。
终于去到巴士站，
大姊姊︰「我有车啦！拜拜！」﹙大姊姊见有巴士到，同我哋讲Bye Bye之后，就一支箭冲上车﹚
开心欢送大姊姊之后，我哋就继续去探险，响巴士站附近见到我个老友傻狗，佢见到我哋就好兴奋咁打招呼摇尾。
傻狗︰「早晨呀！」
花花︰「傻狗，早呀！咁早去边？」
傻狗︰「我老板出嚟晨运咪跟佢出之嘛。」
花花︰「我就同老友去探险，顺便睇吓有无嘢食。」
花花︰「佢系小黑队长、Mimi同黄黄。」﹙我哋亘打招呼﹚
小黑队长、Mimi、黄黄︰「早呀！」
花花︰「走先啦，Bye！」
同傻狗say goodbye之后，我哋继续行呀行，殊不知听到有人大叫。
司机︰「让开呀，行埋路边啦，车死你哋呀！」﹙有位司机大佬好大声咁闹我哋兼狂响咹﹚
花花︰「原来我哋行紧马路中间，怪唔得佢会咁嬲嬲猪！」﹙花花伸伸脷﹚
时间差不多中午，花花︰「出嚟好耐啦，要返去啦！。」﹙花花召集大家回程﹚
小黑队长︰「不过我哋未揾到任何食物㖞！」
花花︰「唔怕啦，可能返到入村有人会俾食物我哋呢！」(于是大家就打道回府)
呢个时候，高底耳犹然自得咁响路口碌地沙。
高底耳︰「你哋去咗边？」
小黑队长︰「唉！今日又要挨饿啦！」
花花︰「或者有呢！」
小黑队长︰「我哋始终系放养狗，主人一早就已经搬走，食无定时，有嘢食已经好幸运；唔似得𠮶啲宠物狗，依时依候有饭食，有人呵护，有人关怀备至，一有头晕身㷫，就有专人随传随到服侍你。」
黄黄︰「系呀！系呀！」
花花︰「唔好咁啦！不如我哋瞓阵先，话唔定有人返嚟会俾嘢我哋食呢，而且我哋重有使命要保卫呢条村，唔可以唔够瞓。」
(于是，大家就四散去揾有利地盘，可能系车底，可能系冷巷，亦有可能系草丛)
花花一睁开眼已经系晚黑。
花花︰「原来系放工时间嗱！有车头灯光㖞！」
Mimi︰「系『妈妈爸爸』架车返嚟啦！唔知有无带嘢俾我哋食呢？」
(响呢个时候，有个男人落车)
男人︰「过嚟过嚟！买咗嘢食俾你哋，个个都有份唔使争。」﹙原来系『爸爸』﹚
(大家就二话不说，一拥而上各自争食)
小黑队长︰「你睇，大姊姊一家都返嚟啦！」﹙小黑队长突然好大声咁吠通知大家﹚
大姊姊︰「小黑队长！Mimi Mi Mi Mi！花花 花 花 花！黄黄猪！高底耳！」
﹙通常大姊姊返嚟时都会用magic word逐一叫我哋﹚
Mimi一定会用最快嘅速度同大姊姊比赛跑去大门口，我、黄黄、小黑队长亦会紧随其后，至于高底耳就随心情而定。
咁啱，隔离屋嘅稀客雪雪唔知系咪有顺风耳收到风，亦过来趁热闹，大家都心急等待大姊姊派狗狗小食。
花花︰「快啲啦！我口水都唔受控制啦！谂起出面包住𠮶层鸡肉干，真系好美味呀！」(花花啲口水不由自主咁流落地下)
Mimi亦表演佢嘅高难度杂技，就系跳高接食物。(得戚得佢呀)
相反，小黑队长可能好渴望好似以前主人咁，有人轻轻摸摸佢个额头就满足。
又系完满嘅一日，真系各得其所。
大姊姊佢哋一家系最近先搬嚟，但对我哋狗狗好好！曲架哥哥一家又成日帮我哋换水，仲有『妈妈爸爸』都有喂我哋，
对于我哋呢班放养狗，虽然唔系佢哋养，都咁关心我哋，
真系多得佢哋个个有心人，我哋先唔使饿死！