【放養狗花花 – 天天看世界 - 日常】
花花︰「又一日新開始啦！」﹙花花伸一伸懶腰﹚
「尋晚發咗個怪夢，有人俾咗好多好多嘢食我哋呀，個個都食到好飽！」
花花︰「唔知今日去邊道玩好呢？Mimi？小黑隊長？」
小黑隊長︰「我想繼續瞓，尋晚成晚巡邏都未瞓夠。」
Mimi︰「我想等『媽媽爸爸』落樓，可能會有嘢食！」
小黑隊長︰「佢哋都唔係你真嘅爸爸媽媽！」
Mimi︰「我當係㗎啦！」
花花︰「正一為食鬼！」
花花︰「唔好嘈住，曲架哥哥出緊嚟！」﹙花花嘅電動尾搖過不停﹚
Mimi亦不甘視弱，用佢最快嘅速度跑過去。
曲架哥哥︰「狗狗、狗狗，你哋好精神喎！我要返工啦，拜拜。」
花花︰「Mimi你睇，二樓大姊姊都落樓啦，我哋過去睇吓。」
花花、Mimi︰「早晨呀！大姊姊！」﹙花花同Mimi向大姊姊鞠躬講早晨﹚
Mimi︰「今朝不如跟大姊姊出去散吓步？」
花花︰「都好。」
小黑隊長、黃黃︰「等埋我哋呀！」﹙黃黃同小黑隊長由老遠跑過嚟﹚
我哋仲問埋高底耳會唔會一齊去。
高底耳︰「我要守住個地盤，萬一隔離肥寶同瘦寶過嚟就無人應付佢哋。」
﹙高底耳一本正經又好似學者咁同我哋分析形勢﹚
於是，我哋就浩浩蕩蕩跟著大姊姊出去。
通常一朝早路上都有好多晨運嘅公公婆婆、男男女女，有人做六通拳同八段錦、有人做甩手操、有人聽歌跑步，亦有人傾偈吹水，各式其式。
突然，大姊姊發現前面有位大嬸帶住一隻臘腸狗喺度同幾位晨運客吹水，臘腸狗好似意識到佢後面有其他狗出現，於是乎佢望向後面，嚇然見到我哋四隻大狗响佢後面行緊，佢簡直騰晒雞，不知所措。
臘腸狗︰「有無搞錯，晨咁早就撞到四位人兄，真係該煨囉！」
「佢哋睇我唔到，睇我唔到…………睇我唔到！」
臘腸狗不斷望向主人求救，但係佢主人只係掛住同旁邊嘅人一路行一路傾，無理過佢；於是，臘腸狗就一路行一路望住後面，怕我哋從後偷襲。
呢個時候，大姊姊立時退後一步，好似示意我哋佢會改行第二條路，黃黃係第一隻望到大姊姊，於是佢叫我哋留意，我哋都好合作，然後去到一個停車場入口，大姊姊迅速轉入停車場，我哋亦好快跟上，結果平息咗呢場不必要嘅「大戰」，臘腸狗亦鬆一口氣。
終於去到巴士站，
大姊姊︰「我有車啦！拜拜！」﹙大姊姊見有巴士到，同我哋講Bye Bye之後，就一支箭衝上車﹚
開心歡送大姊姊之後，我哋就繼續去探險，响巴士站附近見到我個老友傻狗，佢見到我哋就好興奮咁打招呼搖尾。
傻狗︰「早晨呀！」
花花︰「傻狗，早呀！咁早去邊？」
傻狗︰「我老板出嚟晨運咪跟佢出之嘛。」
花花︰「我就同老友去探險，順便睇吓有無嘢食。」
花花︰「佢係小黑隊長、Mimi同黃黃。」﹙我哋亙打招呼﹚
小黑隊長、Mimi、黃黃︰「早呀！」
花花︰「走先啦，Bye！」
同傻狗say goodbye之後，我哋繼續行呀行，殊不知聽到有人大叫。
司機︰「讓開呀，行埋路邊啦，車死你哋呀！」﹙有位司機大佬好大聲咁鬧我哋兼狂響咹﹚
花花︰「原來我哋行緊馬路中間，怪唔得佢會咁嬲嬲豬！」﹙花花伸伸脷﹚
時間差不多中午，花花︰「出嚟好耐啦，要返去啦！。」﹙花花召集大家回程﹚
小黑隊長︰「不過我哋未搵到任何食物喎！」
花花︰「唔怕啦，可能返到入村有人會俾食物我哋呢！」(於是大家就打道回府)
呢個時候，高底耳猶然自得咁响路口碌地沙。
高底耳︰「你哋去咗邊？」
小黑隊長︰「唉！今日又要捱餓啦！」
花花︰「或者有呢！」
小黑隊長︰「我哋始終係放養狗，主人一早就已經搬走，食無定時，有嘢食已經好幸運；唔似得嗰啲寵物狗，依時依候有飯食，有人呵護，有人關懷備至，一有頭暈身㷫，就有專人隨傳隨到服侍你。」
黃黃︰「係呀！係呀！」
花花︰「唔好咁啦！不如我哋瞓陣先，話唔定有人返嚟會俾嘢我哋食呢，而且我哋重有使命要保衛呢條村，唔可以唔夠瞓。」
(於是，大家就四散去揾有利地盤，可能係車底，可能係冷巷，亦有可能係草叢)
花花一睜開眼已經係晚黑。
花花︰「原來係放工時間嗱！有車頭燈光喎！」
Mimi︰「係『媽媽爸爸』架車返嚟啦！唔知有無帶嘢俾我哋食呢？」
(响呢個時候，有個男人落車)
男人︰「過嚟過嚟！買咗嘢食俾你哋，個個都有份唔使爭。」﹙原來係『爸爸』﹚
(大家就二話不說，一擁而上各自爭食)
小黑隊長︰「你睇，大姊姊一家都返嚟啦！」﹙小黑隊長突然好大聲咁吠通知大家﹚
大姊姊︰「小黑隊長！Mimi Mi Mi Mi！花花 花 花 花！黃黃豬！高底耳！」
﹙通常大姊姊返嚟時都會用magic word逐一叫我哋﹚
Mimi一定會用最快嘅速度同大姊姊比賽跑去大門口，我、黃黃、小黑隊長亦會緊隨其後，至於高底耳就隨心情而定。
咁啱，隔離屋嘅稀客雪雪唔知係咪有順風耳收到風，亦過來趁熱鬧，大家都心急等待大姊姊派狗狗小食。
花花︰「快啲啦！我口水都唔受控制啦！諗起出面包住嗰層雞肉乾，真係好美味呀！」(花花啲口水不由自主咁流落地下)
Mimi亦表演佢嘅高難度雜技，就係跳高接食物。(得戚得佢呀)
相反，小黑隊長可能好渴望好似以前主人咁，有人輕輕摸摸佢個額頭就滿足。
又係完滿嘅一日，真係各得其所。
大姊姊佢哋一家係最近先搬嚟，但對我哋狗狗好好！曲架哥哥一家又成日幫我哋換水，仲有『媽媽爸爸』都有餵我哋，
對於我哋呢班放養狗，雖然唔係佢哋養，都咁關心我哋，
真係多得佢哋個個有心人，我哋先唔使餓死！