最紧要唔好惊! 女生独游小贴士

 

我曾经独游非洲欧洲美洲亚洲不同大小的国家，从第一次既兴奋又紧张，到后来每年一次的出游， 我渐渐明白到独游可能系一种therapy, 每一次都系重新认识自己, 解放潜能嘅机会。 正所谓试过先讲，未试过嘅又点知啱唔啱自己呢？ 

定啲嚟，唔洗惊
女生独游成日都畀人话：「危险呀,唔好去呀。」唔好意思，其实做乜嘢都会危险，你出街都有可能会被车撞（绝无诅咒既意思）,其实女仔独游，只要够细心，做足行程准备，唔好做傻事，其实冇乜嘢难到你。

好似一个女仔出街食饭，难免会俾人搭讪，但呢个时候请相信你嘅第六感，如果呢个人比你嘅感觉唔好，礼貌拒绝已经可以，正常人通常识做。 最重要唔好show到你好惊青, 一惊就弊，有心人反而想食住上。

拣间有信誉嘅酒店
而家好兴民宿，airbnb，青年旅舍等等，但系自己出游嘅时候，其实最好拣番啲有信誉嘅国际连锁酒店。原因系，如果第一次去嘅话，人生路不熟，连锁酒店起码佢哋嘅服务质素会有保证，你唔需要烦货不对办，保安等等嘅问题，而佢哋通常会有24小时front desk, 需要协助嘅时候通常都帮到你。

曾经去缅甸嘅时候，第一晚因为要驳清晨机，所以拣咗一间好平嘅青年旅舍，谂住摆低行李瞓一阵，冲个凉就去机场。点知𠮶度唔单止瞓瞓下停电冇水，清洁程度又差，而且房门系锁吾到（当时订单人房）。最后冇办法之下，我提早check out, 宁愿去机场坐住等天光。

Plan埋交通时间
第一次去一个地方，当然想到处玩，博物馆、餐厅、观光、行街等等，有冇谂过要plan埋交通时间？如果有能力，拣一间喺旺区嘅住宿会系一个唔错嘅选择，因为旺区通常可能系市中心或者邻近地铁，比较近啲观光地点，可以悭番好多搭车转车嘅时间，而且夜晚出去食完饭之后，返酒店亦都会比较方便。

另外，check定开放时间都好重要。每个国家都有唔同嘅生活习惯，例如阿拉伯国家系星期五、六为周末，欧洲国家好多星期日未必开舖等等，唔想白行一趟，就最好check定开放时间， 需唔需要预约等等。

善用手机上嘅app
女生出去玩嘅时候，最好唔好带太多一袋二袋出去，一来比较笨重唔方便，二来其实手机有好多app可以用，例如Google Map 可以代替地图，仲建议埋交通路线， 简直系出游恩物。 其他例如TripAdvisor 同 Yelp 之类，都可以知道某某餐厅，某某地点值唔值得去，够唔够地道，服务好唔好等等，非常好用。

持开放态度对待任何人与事
香港的确系一个好方便嘅城市，好多时香港人亦都畀佢嘅高效率宠惯咗。出游嘅时候会发现其他地方相对无咁方便， 或者人比较慢嘅时候，最紧要持一个开放嘅态度去看待。要记住我哋只系一个游客，佢哋系喺𠮶度生活，每个人都会有自己嘅风土人情难处， 多一份包容，有问题嘅时候深呼吸一啖，你就会发现问题其实冇想像中咁难处理。 最重要嘅系你得自己一个，打交都无气势！

之后再讲下其他旅游趣闻，祝大家早日有得飞✈️