时势造Mirror ，Mirror造时势

利申我唔喺镜粉，12个成员我只认得几个，反而Error 得4个，而且位位辨识度高，容易认。

任何潮流都喺一个循环，今日兴嘅听日就过晒气，以为旧嘢原来某日又兴番，道理一字咁浅。

我细个时兴许冠杰，广东歌热由此而起，我小学教中文个老师狠批Sam Hui歌词口语化，唔合所谓书面语规则，我当时心谂你识条铁咩，日日返屋企听住录音带背歌词。唔够几年，潮流已经喺一片东洋风，时下兴嘅喺谭咏麟张国荣梅艳芳，跟手张学友同吕方一出道就可以去红馆开演唱会，而阿爸仲话张国荣唱歌咬字唔正，阿哥已经狂loop 哥哥嘅不覊的风，双亲仲听紧邓丽君青山姚苏蓉。

四大天王时代我已经开始少听歌，识得最多嘅都只喺张学友嘅歌，黎明识十首八首，郭富城再少啲，刘华只喺识我恨我痴心同独自去偷欢，但我唔会话唔知佢哋喺边个啰。

之后冒起嘅陈奕迅容祖儿红透半边天，Twins 更加喺奇葩，不过除咗单春子，其他人嘅歌我都唔识，但唔会觉得佢地有咩问题，从来百花齐放喺好事，有自由选择自己钟意嘅，而唔去批斗另一啲先喺良性现象。而我阿妈仍然钟情邓丽君，一啲问题都冇。

当个个话香港乐坛青黄不接后继无人，Mirror异军突起，有班人又觉得佢地未够班，仲话唔识佢地，平行时空到咁，想点。

事实喺无论男团女团，总会有啲质素高啲有啲就差啲，好正常，草蜢最唱得嘅都只有蔡一杰，但唔会有人觉得剩番佢就可以取代草蜢。道理一字咁浅。

事实喺Mirror弹起，都唔喺突然之间，人地付出嘅努力相信唔喺人人都付得起，而现实喺人人都可以努力，但潮流亦要讲时势，宜家时势就喺啲人唔想呢个地方再老化，亦唔想失去香港地地道道𠮶阵味，要保育广东歌，就要有新嘅生命力灌溉落去，Mirror 同Error 就表现紧呢种生命力，后生唔喺大晒，但至少唔会老油条，更加唔会老屎忽。

Mirror要继续进化，先可以驾驭时势，带领潮流，否则一样被时势吞噬，被潮流淹没。喺我认识当中，从来能够永远流行嘅，喺我眼中，西方只得MJ，东方嘅只有张国荣。

𠮶十几个后生仔可以走几远除咗睇佢地有几努力，仲要睇时势，最好喺多几队Mirror或Error出泥斗过，咁乐坛想唔番生都几难，团名可以叫Killer、Viewer或者Thriller——其实我30几年都只喺听紧MJ🤣。