企業管理：讓員工安心，企業自然賺錢

在公司管理中，我們常常聽到「以人為本」，但具體怎樣做才算真正關顧員工？中國式管理強調「安人之道」，意思是要讓員工、顧客、股東甚至社會大眾都感到安心。當大家安心，企業自然會步入正軌，利潤也會隨之而來。

「安人之道」可以分為三個階段，兩個關鍵要領，以下五個重點。

第一階段：建立共識，唔好淨係講錢

企業上下要有一致的理念：唔好淨係將「賺錢」掛喺嘴邊，而係要將「令人安心」作為目標。簡單講，就係「推己及人」你自己想安穩，都要令身邊人安穩。

當員工覺得公司關心佢哋，自然會由「向心」變「同心」，再由「信心」變「忠心」。到時工作效率高、士氣好，唔需要刻意追利潤，利潤都會自然嚟。

第二階段：探究不安，主動了解同事諗咩

作為管理層，唔好等同事出聲先去做嘢。要主動去了解：同事有咩不滿？顧客有咩投訴？股東有咩憂慮？社會對公司有咩看法？

好似探熱針咁，探出大家潛藏嘅不安情緒，及早發現問題。

第三階段：消除化解，唔好拖，唔好呃

發現問題之後，就要對症下藥。可以分三種情況處理：

1. 即刻可以做嘅，就即刻做

   例如，最近天氣酷熱，同事喺戶外工作或出入送貨成身汗，返到辦公室一臉疲憊。與其等到明年換冷氣，不如即刻喺茶水間增設一把強力工業風扇，甚至即日準備冰凍嘅毛巾或紙巾。呢個動作雖然細，但同事會即刻感受到：「公司真係見到我哋辛苦，即刻有行動！」呢啲就係誠意同決心嘅表現。

2. 暫時做唔到嘅，坦白講

   例如同事想公司安排車接送返工，但公司財政負擔唔起，就清楚話俾大家知：「我哋明白大家辛苦，但暫時真係冇辦法。」唔好拖住人，唔好畀假希望，否則只會令人失望。

3. 需要時間解決嘅，講個時間表，例如同事成日話公司電腦太慢，開個檔案都要等幾分鐘。公司可以回應：「我哋明白呢個問題好困擾你哋，我哋已經決定咗要全面升級，但由於預算同採購程序，預計要三個月後先可以全部換新。呢段時間請大家忍耐吓，我哋會定期滙報進度。」咁樣講，同事就會覺得公司有誠意解決，願意耐心等待。

要領一：講究方法，唔係討好，而係尊重

管理唔係一味順從員工，而係要「惜佢」，唔係「害佢」。要尊重同事、睇得起佢哋，用適合中國人文化嘅方式去領導、溝通、激勵。

如果你發現自己愈管愈攰，方法可能已經出咗問題，要識得檢討同調整，唔好死撐。

要領二：注重效果，做咗唔等於做好

任何措施都要追蹤成效。如果發現同事依然愛理不理，就要反問自己：係咪態度有問題？方法唔啱？千祈唔好抱住「我講咗㗎喇，聽唔聽由你」嘅心態，因為一次冇效果，就會有第二次、第三次。

最後宛達一提：初入職場嘅朋友仔，先睇學到咩，唔好只顧搵幾多 ，我成日同後生仔講：入一間公司，第一件事唔係問人工，而係問「我可唔可以喺度成長」、「考慮自己第時出去會唔會俾人睇低」。如果呢間公司形象好、有得學嘢、有前途，就唔好輕易跳槽。