由一個兼職樓面仔變成一個「煮飯仔」

20歲得副學士畢業學歷嘅我，由一個靠兼職樓面賺錢養自己嘅男仔，變成一個日日包攬晒所有家務嘅煮飯仔。話說上年家父、家母因心臟問題先後入院，出院後身體狀況大不如從前，自此，我就開始左我嘅煮飯仔生涯。啱啱開始個陣其實唔係好慣，以前最多都係做下家務，無諗過有一日要照顧全屋企人嘅生活起居飲食。

        上年十一月開始，每朝九點起身，然後開始煮早餐比自己同屋企人食。因為，個個飲食習慣唔同，所以有時要煮三次。然後到中午十二點，就要出去買餸，諗定要食啲乜野。買完翻到屋企，又要煮中午個餐，不過中午個餐多數湯飯，再唔係就煮即食麵。

        最辛苦係晚餐，因為要一個人煮晒四個餸然後再洗埋碗。我相信係疫情下，好多人可能都會留係屋企，但未必因為家庭問題而留係屋企做家務。其實有時候都有啲壓力，因為要包攬所有家務，甚至放棄埋份工。講左咁多，其實都係想大家多啲體諒自己嘅媽咪，或者一路默默照顧你生活起居飲食嘅人。去到而家六月，其實我日日生活都同上面差唔多，不過因為咁，我比以前仲更加獨立，識得煮飯，識得照顧人。每一次嘅磨練，都係成長嘅機會，唔好害怕，勇敢面對，一定會有啲得著。