【日本遊】港女和服拍攝攻略

港女去旅遊當然要影靚相啦！除咗為每次嘅旅行留下美好嘅回憶之外，仲可以為青春留下倩影。去到日本，相信大家都會著返套和服，到日本嘅每個角落都影下相。就好似嗰篇潮文咁：「千祈唔好畀女友著和服！因為佢會覺得自己好靚 ...」每個女仔一著起和服都會發晒癲，立即激發晒身上全部嘅港女細胞，不停係咁影影影，一日幾千張相完全係有可能！所以今日就教你，點先可以影到靚靚嘅和服美照啦！

1. 低炒角度
去到日本玩，每個旅遊景點都好多遊客。隨便影張相，唔仔細搵根本無可能搵到自己嘅身影，只會影到一堆人山人海嘅畫面。當聚會嘅時候，show啲旅行俾親朋好友睇，仲要攞隻手指指住自己，話俾人知：「呢個咪我囉！」為咗逼免呢類型嘅尷尬情況，一於就低炒啦！一來可以清晰影到自己，完全避開晒其他嘅遊客，二來仲可以影到一啲較高嘅景物全景呢！

2. 乾淨背景

去旅行，景點重要，但著和服，主體都好重要！難得飛到日本，難得扮下架妹，唔通唔影一下自己嘅特寫咩？搵一幅乾淨嘅背景，最好就有少少日本當地嘅元素，然後自己企喺前面擺下pose！唔識擺Pose嘅朋友可以嘗試下影啲側面或者背面，因為和服上面有好多detail位，唔一定要成日係咁影正面ga！

3. 運用道具

如果全輯相都係企直直喺度，難免會覺得有啲悶。但唔係人人都識擺pose，所以道具道派上用場喇！見到啲得意嘢，不妨試試同佢互動下，拎上手又好，摸下佢都好，總之唔好俾個畫面咁悶就得喇！成輯旅行相有啲得意啲嘅畫面，會令成件事生動好多ga！