星期五的乌鸡
11月13号系黑色星期五，每次到呢啲日子我都叫自己唔好记住，因为我平时已经系卤水鸡，但系到呢啲日子直头变左乌鸡，真系唔到我唔信…
到底边个发明黑色星期五嘅呢？我怀疑呢个系咀咒…呜呜
行到巴士站，架车想开走，劲跑100米，终于追到，车尾…
「唔紧要，搭小巴转地铁啰…」
去到东铁站，突然有广播「因为有动物闯入路轨，列车将稍为延误，敬请原谅…」
成日话有动物闯入，究竟系咩呢？想搭火车但冇买飞既人？
「等多一阵啫，唔紧要，行快两步咪得啰…」
仲要转多次小巴先到公司，一路急步一路食饼当早餐，成日咁样食早餐，会唔会盲肠炎架？
咬第一啖，块饼“淋”晒，唔食得喇…明明未到期架，激气…
「算啦…当减肥…」
愈心急愈冇车，等左半个钟先上到，真系…隔离又坐左个讲电话超大声既阿叔，瞓著都俾佢吓醒…
「唔瞓会精神啲嘅…」
一返到公司就俾人围，问我点解锁柜桶，搞到佢地攞唔到野，仲问我有咩摆喺入面，点解要锁？
个柜桶系俾我摆野架嘛…你理得我锁唔锁啫？我摆咩关你咩事呢？做咩要攞我D野呢？
佢地仲问「条锁匙你攞走埋呀？」，梗系啦…如果唔系锁黎做咩呀？咁白痴既问题都问…
「算…唔好嬲，我晏就放假架喇…放松放松…」
朝头早通常都比较静，我仲谂可以轻轻松松到1点钟。
因为晏就请左假去睇医生。点知啲野多到离谱，都唔知系咪有心玩野…
「一定赶得切既，一定得既…」
以为可以食个饭，点知都系唔够时间，买左份三文治顶住先…
一打开，未食就有只蚊同我争，谂住拨开佢，一拨成份三文治就跌左落地下…
到头来都喺要饿住个肚，喺医院…等
「唔紧要，睇完可以食架喇…」
睇完，谂住去个洗手间，点知一、二、三楼一齐洗紧厕所，呢间咩医院黎架？
「唔紧要，过两条街有商场，到商场先去啦…」
5分钟之后，排到我喇…点知一挂个袋上去，个钩连埋个袋就“拍”一声咁跌落黎，我个袋呀…
「唔紧要，唔紧要…返去洗啦…无事嘅…」
跟住，拉裤链既时候，一拉个扣就断左，我要强调呢条裤系新架…
「算啦…好彩唔系成条拉链烂，都拉到嘅…」
今日咁黑，一定要食返餐好既补数，有间门面几靓既餐厅，以为有餐安乐茶饭食…
“格”蛋壳…我都估到架喇…次次食蛋都食到蛋壳，但系我偏唔信邪，点知又中…
「唔紧要，证明只蛋系真嘅…」
终于…返到屋企喇…冲个凉，洗晒D黑气就冇事架喇…
点知…冇晒枧液呀…
「呢样…好紧要呀…天呀…点解咁对我呀…想冲个凉啫…呜呜…」
乌鸡的故事继续…
回应