【俄罗斯】出发前你必须要知的十件事（下）

俄罗斯真系一个好靓好抵玩嘅国家，完全适合又想去长途旅行，但又想穷游嘅小伙伴！上集就讲左去俄罗斯必须知道嘅头五项小知识，今集就讲埋之后嘅五项啦！

6. 饮食

嚟到俄罗斯根本唔好谂住要揾美食、餐餐都大鱼大肉，有正常野食都已经好难得！普遍俄罗斯餐都系偏干身，香港人未必食得惯，所以我最后决定都系食快餐，好似比当地嘅餐馆好味(纯属个人感受啦)！但因为野食唔太好食，花费喺饮食嘅费用相对较少，都系一种好处吧！

7. 地铁

莫斯科有「全球最美地铁站」嘅称号，最特别嘅系佢嘅装潢！同一般大城市嘅工业风铁路站完全唔同，佢满满都系壁画、云石、吊灯，同参观宫殿、博物馆嘅感觉差唔多！每一个站都代表某一段历史故事，但我对俄罗斯历史认识唔深，所以就无深入研究当中嘅故事！如果你有时间，游地铁河都系一个唔错嘅行程，打下卡影下相，真系可以玩到一日！

8. 插头

作为现代人，手机完全不离身，所以一定会问：「去俄罗斯需要带转插？」俄罗斯境内嘅电压为220伏特(50赫兹)，插头使用圆柱式欧式标准插头！所以同香港平时用嘅扁平三脚插完全唔同，所以大家一定要带定转插喇！

9. 学生优惠

去到俄罗斯，你一定会去好多唔同嘅博物馆同gallery参观，但计计埋埋入场费一定好贵，可能占你接近一半嘅旅费开支！如果你仲系学生嘅话，一定记得要喺香港申请定International Student Card，唔少地方都设有学生价，甚至系学生免费参观嘅优惠！因为普通学校嘅学生证系无得享用学生优惠，所以呢张卡真系可以帮你悭到唔少钱！

10. 安全

我觉得俄罗斯都算系个安全嘅旅游地方，至少我自己，同埋身边嘅朋友，都无被偷嘢被抢嘢嘅经验。但旅游区嘅人就真系比较多，尤其是系红墙，去到啲人多嘅地方，财物最好收得好少少喇！