【俄罗斯】出发前你必须要知的十件事（上）

由于经常旅游，唔少朋友都会问我：「到底去边度玩好？」事先声明，无论长途短线嘅旅程我都十分之爱，但最抵玩莫过于俄罗斯！今日就同你分享，去俄罗斯前必须要知道嘅事啦！

1. 语言不通

就算你英文有几好，去到俄罗斯都系无用，因为当地人系唔识英文！就算系机场定餐厅，都无人会用英文同你沟通，就算同佢哋「this one this one」，都无人明你讲咩，所以google translate真系好重要，你全程都要靠晒佢！其实仲有个小贴士，如果你要去快餐店食嘢，最好用电话影张相俾店员睇，好过你指手画脚几分钟～

2. 物价

自从卢布贬值之后，俄罗斯物价简直抵到无人有！唔计机票住宿，净计吃喝玩乐，我十日嘅旅程只系用咗了$2000，而当中的四分一更加系用喺买俄罗斯娃娃嘅身上。我唔算是系穷游，一日食足三餐，想去嘅景点都有付入场费，但只系用咗$2000，就知道物价真系十分之抵！

3. 天气

我到俄罗斯嘅时候系六月，算系刚入夏嘅时节。尽管如此，莫斯科晚上嘅气温却不足10度！风好大，显得格外冻，所以话「俄罗斯真系俄罗斯」，就算夏天都要著羽绒！仲有因为高纬度嘅原因，俄罗斯嘅夏季白昼极长，到晚上九点几先会日落，我真系睇过晚上十二点都有阳光嘅景象。

4. 黑面

俄罗斯人真系无乜笑容，天生就黑口黑面，以为佢哋唔想理你咁样。但我可以话你知，佢哋系得个样系咁咋！当时我一到俄罗斯，完全揾唔到住宿嘅位置，只好去问路！遇到个Cool爆嘅女仔，首先系语言不通，其次系佢都唔识路。虽然佢仍然系黑面，但佢又帮我哋打电话去住宿𠮶边沟通，最后仲带埋我哋去门口。所以唔好再以为佢哋真系咁难相处啊！

5. 芭蕾舞

连唔系跳舞嘅人都会听过Bolshoi Ballet，所以去到俄罗斯点可以唔睇一场超高水准嘅芭蕾舞表演呢！莫斯科最出名的是莫斯科大剧院 (Bolshoi Theater)，可以欣赏到世界级嘅芭蕾舞表演！因为无可能买到即日嘅场次，记得要事先到莫斯科大剧院嘅官方网站购票喇！