做Slash/Freelancer = 冇前途？他們值得更多尊重和鼓勵！

好多時聽啲Slash或者做唔同Freelance嘅朋友，向我大吐苦水，話屋企人經常畀說話自己聽，例如「好心就正正經經搵份長工做啦」、「百足咁多爪，你做得邊樣？」、「收入又唔穩定，炒埋都未夠一碟」之類極mean嘅說話。

其實，做得Freelance，係咪真係將收入擺喺第一位？要搵錢，相信離唔開金融行業。地產、保險、銀行呢啲咁搵得，其他行業係咪冇存在價值？

我覺得，睇唔起做Freelance或者Slash嘅人，對佢哋存在太多誤解。做Freelance嘅人，所負責嘅嘢隨時比打長工嘅仲要多，例如你做Sales，你每日都係執吓貨，搵吓客，做Closing，最多做埋收銀等等，但Freelancer日常已經要裝備自己，十八般武藝樣樣要識，平日唔幫自己增值，點樣有工作機會？

其次，邊個話Freelance搵唔到食？我公司有Freelance，做緊幾份工，就係唔鐘意齋打死一份，日日朝九晚六坐喺度扮工，加埋加埋收入比我呢份長工仲要多！只要本身有料，自己Deal每單Job個價錢可以幾何級數咁跳！

尤其依加武漢肺炎肆虐，大把公司要Cut Cost要炒人要放No Pay Leave，做Slash當然工作機會少咗，但本身打開幾份嘅佢哋，就好有效咁分散風險，起碼唔會冇工返或者被炒魷，呢個環境你以為冇得做，實際上仲穩陣過長工。我真心覺得身邊做Freelance嘅朋友，個個樂觀唔計較，而且好肯嘗試唔同嘅Job，幾乎有Job都會接，試問喺香港金錢掛帥嘅城市，有幾多呢類人？

同埋，千其唔好覺得做Slash唔正經，依加好多人仲行緊舊時嗰套，以為返寫字樓工比較優越，西裝骨骨先叫正經，No No No！Slash唔係話做就做，本身要對自己好有信心，覺得自己喺唔同環境底下，都能夠適應唔同嘅要求，咁先係一個成功嘅Slash同Freelance。Come on！依加已經係廿一世紀，思想係時候要與時並進，做多兩份Freelance嘅付出，絕對不下於一份所謂朝九晚六嘅長工，賺嘅錢亦唔一定比中環班西裝友少。最重要係，Freelance好有可能過得比返長工嘅人開心同滿足。

所以，我覺得做緊Freelance同Slash嘅朋友仔，真係值得更多尊重同鼓勵。